ፀገም መንበርን መስርሕን ቦታ ካብቶም መሰረታዊ ጠለባት ደቂ ሰባት ሓደ ምዃኑ እሙን እዩ። እዚ ፀገም እዙይ እንተዘይተፈቲሑ ድማ ካልኦት ብዙሓት ፀገማት ከምዘስዕብ ግልፂ እዩ። ጥቕልል ኣቢልካ እንትርአ ኢኮኖምያዊ፣ ፖለቲካዊን ማሕበራውን ቀውሲ ከምዘስዕብ ምቕማጥ ይከኣል። ጥልቀቱ ግን ካብዙይ ንላዕሊ እዩ። ንትግራይን ተጋሩን ብዙሕ ዋጋ ዘኽፈለን ኣብ ምኽፋል ዘሎን ገዚፍ ማሕበራዊ ፀገም ምዃኑ ሩዱእ እዩ።

ንኣብነት፤ ምምስራት ሓዳር፣ ምውላድ ቆልዑን ምፍጣር ሕጉስ ቤተሰብ ምስ ዋንነት ገዛ እናተተሓሓዘ ዝነብር ሰብ ብጣዕሚ ብዙሕ ምዃኑ ኣረጋጊፅና ኢና። ካብዙይ እንርድኦ ድማ ዘርእና ከይውስኽ፣ ኢኮኖሚና ከይዓቢ፣ ኣተሓሳስባና ዘሓሸ ለውጢ ከየምፅእ ቀይዱ ብምሓዝ ከቢድ ተፅዕኖ ከምዘሕደረልና ተገንዚብና ኢና።

ካብዙይ ተበጊስና ነቲ ዓውዲ ብኣግባቡ ንመዝን እንተይልና፤ ስራሕቲ ህንፀት መንበሪ ኣባይቲ ንዋሕስ ዝህቦ ትርጉም፤ ካብ ስሙ ንላዕሊ ትርጉም ዝወሃቦ ዓውዲ ስራሕ ምዃኑ ኢዬ። ብኻሊእ ኣዘራርባ ምልማዕ ኣባይቲ ተራ ህንፀትን ምንቅስቓስ ንግድን ጥራሕ ኣይኮነን። የግዳስ ኣብ ዙርያ ኩለመዳይ ልምዓት ሕብረተሰብ ዕዙዝ ግደ ዝፃወት ዓውዲ ኮይኑ ኢና ረኺብናዮ።